Nederlands

CURA DOET 2019

 CURA DOET 2019

Kansá pero satisfecho despues di aktividat CURA DOET 2019

E alegria ku e trahadónan di Kontraloria General a eksperensiá na CURADOET 2018 tabata pidi pa mas. P’esei e aña aki atrobe algun trahadó a mèldu nan mes komo boluntario pa partisipá na CURADOET 2019.

Un sondeo chikí a mustra ku e proyekto di limpiesa di Playa Charomba tabata e faborito apsoluto pa e boluntarionan. E intenshon tabata pa dia 15 mart 2019 entre 8or di mainta pa 2or di mèrdia kita plèstik i otro desperdisio, kòrta mata i mantené e ruta di kaminata den e área di e bahia.

Na último momentu e plan aki a kai na awa dor di e oumento drástiko di sargassum den e bahia, lokual ta funesto pa e turtuganan i piskánan. Ademas e sargassum aki ta manda un oló desagradabel ku ta ole te leu den e área. Tabata apsolutamente nesesario pa mas pronto ku ta posibel saka e sargussum for di e bahia.

E boluntarionan mesora a kohe hèrmèntnan i kuminsá saka e sargassum for di e bahia. Tabatin ambiente i e spit tabata altu apesar di e trabou duru den e solo kayente, banda i hasta den e awa. E echo ku sargassum nobo tabata keda drif bini paden no a kita e goso. Despues di un pasaboka leve e trabou a sigui te ora e señal pa terminá a wòrdu duná.

Kansá, pero kontentu ku un biaha mas den union a duna un granito na mehorashon di medio ambiente, e boluntarionan a regresá kas pa disfrutá di un baño bon meresí!

Galeria di portrèt