Nederlands

Organisashon

Kódigo di Kondukta

Kontraloria ta konsiente ku su mes integridat den ehekushon di su tareanan mester ta fuera di tur duda. Un kódigo di kondukta ta indispensabel pa un organisashon stimulá integridat den su mes operashon. Kontraloria su kódigo di kondukta ta sirbi komo guia pa e manera ku nos ta trata ku otro i ku tersero, hasi investigashon i atendé asuntu diario na trabou. E kódigo di kondukta ta inkorporá e balornan sentral ku kada empleado mester usa pa dirigié den su desishonnan. Por resumí e kódigo di kondukta di e siguiente manera:

Nos di Kontraloria General di Kòrsou:

  1. a pèrkurá pa nos outonomia ta fuera di tur duda;
  2. ta hasi nos trabou na un manera profeshonal, ophetivo, responsabel i minusioso;
  3. ta kouteloso ku informashon konfiá na nos;
  4. tin un bista krítiko i ta presta trabou di kalidat haltu;
  5. ta habrí pa konosementu i idea nobo, ta mantené nos konosementu i kapasidat na nivel i ta kompartí esaki ku otro;
  6. ta habrí pa komunikashon respetuoso i konstruktivo;
  7. ta enbolbí ku kuestionnan ku ta biba den komunidat;
  8. ta íntegro, kla i transparente, i konsistente den loke nos ta hasi;
  9. ta praktiká ‘fair play’ i ta habrí i sinsero.
 Organisashon

Logo di Kontraloria General di Kòrsou

Por distinguí tres koló den logo di Kontraloria: blou, hel i blanku. E kombinashon di koló akí ta un referensia na bandera di Kòrsou. E koló ku mas ta sobresalí den e logo, blou, ta ekspresá státus di Kontraloria General. E lèternan simpel ta para pa e klaridat di nos informenan.

E imágen den e logo ta inspirá pa un ‘schuifpuzzel’. E nuebe símbolonan den e logo ta representá e nuebe balornan sentral ku Kontraloria ta sigui den ehekushon di su tareanan. E balornan sentral akí ta inkorporá den e kódigo di kondukta tambe.